مفاهيم اساسية في الراب

نهدروا شوي على المؤثر الصوتي الأطوتيون Auto-tune  في مجال الهيب هوب ( Rap ) عالميا ومحليا :  وأي رابر يحب يستفاد فالمجال يتفضل  وطاڨي صحبك يغني راب خلي يهز حاجة.. هاذي المقالة المطولة ما يعطيشهالك اي واحد ومكانش فالأنترنيت  ...

لوطوتين هو مؤثر صوتي تخدم  في أمريكا من مؤسسة Antaras  يعمل على تصحيح المقام الموسيقى لصوت المغني  يعني يصحح  la gamme تع الصوت حساب وش تفرض عليك Lbeat لي راح تخدم عليها . يعني انت راك قاصد تغني في مقام العجم وبالطبيعة راح تديكالي شوي عالمقام هو يرجعك للمقام ويصححلك النوطة الخاطئة  ..

يعني بالمثال إذا كانو ألحان lbeat معزوفين في مقام النهاوند فالـنوطة Mi  يعني اوطوماتيكمون الريڨلاج او التعديلات تع لاوطوتين فالبرنامج راح يكون مضبوط فالنوطة Mi  (minor ) .. هذا أذا كان المغني يعرف المقامات الموسيقية ..وإذا مايعرفش المقامات يعني جل الرابورات لي مايعرفوش راهو يسمع لانستري يبدأ ينسبيري لي تكنيك تع الألحان حتى يحس روحو syncronizè مع لانستري بمعنى يحس روحو متناسق مع ألحان تع لانستري بلا ما يكون يعرف المقامات وو وش نوطات تمشي فيهم لانستري .. باسكو فاتت عليا المرحلة 

لوطوتين تأثيروا على الصوت هو مطور ومحسن للرنة الصوتية يعني يطور  فالـTonalitè ... Tone تع الصوت كي شغل ماكياج تع الصوت كي تسمع تحس انو فيه شغل روح ونفس جميلة .. 

الطبوع الموسيقية فالراب لي يستخدموا فيها لوطوتين اي واحد يعرفهم هم ( الأفرو تراب .. التراب .. النيو سكول بصفة عامة ) لوطوتين جامي تلقاه فالمدرسة القديمة لأنو كاين فرق مابين nas .. Wu tang  و بين

 lil uzi vert .. Kodak black .. مش كيف كيف لحكاية 

لأنو المدرسة القديمة عندها مميزات تميزها عن المدرسة الجديدة .. مميزات فالإلقاء والصوت تعها والفلو  و فالميكساج في خلط الأصوات وفالـbacking tracks وحتى فالـ Vocals ..الفوكالز هم الأصوات تع برررررر وقرررررر ويااااااه و وشيت وقيووو الخ .. لي يكونو تحت الإلقاء   ... و البايكينڨ تراكس هم الإضافات لي يجو تحت الصوت الرئيسي للأغنية يعني بالعامية ساعات تسمع غنية تلقاه الصوت دوبلي يعني زوج يغنيو فوق بعضاهم هكة هاذوك الـbacking tracks  باه توصلك المعلومة حتى وكانك ماعندكش علم بالشئ ... يعني كاين اختلاف كبير بين المدرستين في المجال التقني ومن حيث المميزات..

ورغم انو كاين بعض رابورات المدرسة القديمة فالماريكان استعملو لوطوتين لكن تعرضوا لإنتقادات كبيرة من الأذن الموسيقية ومتتبعي الراب الأمريكي كيما جاي زي ..سنوب دوڨ .. باف دادي ..وكذلك سليم شايدي  إستخدمو الاطوتين لكن مايمنعش انو الاغنية جميلة جداً لكن ذوي الإختصاص والمنتجين قالك عيب .. تفهم خير مالطبيب انت ولا نا 

ومباعد كي شافو الانتقادات أستدركو الأمر بسرعة ولو انو اغانيهم مزالت لي استعملو فيها لوطوتين فاليوتوب ..

يعني نخرجلوا بحوصلة فالنيو سكوول انو اي ارتيست يقدر يستعمل لوطوتين لكن ليس لدرجة انو طبيعة النبرة تع صوتك تروح خلاص... لازم تخلي صوتك على طبيعتو كيما راه .. لكن تكون فيه شوي تأثير تع اطوتين معليش بنسبة ايجابية و مثالية وفق معايير محددة ...... اما باه نسمعك تحكي فريسطايل عالهواء بفلو ووراء الميكروفون بفلو  آخر ..هنا وين راحت لوريجيناليتي بما انك رابر ذو شخصية قوية حتى امور الميكساج ولوطوتين تدخل في شخصية الرابر لأني قادر نكلاشيك من هذا المنبر تع الأطوتين نڨولك انت امسي غير فوسط ستوديو .. وهاذي نقطة سلبية ليك .. 

يعني بالأحرى وراء المايك رابر وو  في فريسطايل في ڨعدة مع صحابك رابر اوخر وكاين بزاف ناس هنا في دزاير ....  انو منيكة بزاف انك تغطي عيوبك فالفلو والإلقاء الكلامي تع فالغنية تغطيه بلوطوتين حرااااام فالراب .. انا واحد مالناس كانت عندي عيوب كبيرة فالفلو وكيفية الإلقاء ... كنت مانقدرش نسيطر عليه.. بقيت نتعلم ونريبيتي منا منا  مع لي شونتار نعرفهم كل يوم نريبيتي  باه نسرح احبالي ونقدر نتحكم في صوتي نطلع نهبط نلحن نخشن هاذي بالربيتيسيون أذا كانك تحب الميدان مش داخلو فيس ... 

كيما يديروا البعض يعني انت كرابر أصيل راك ماكش نورمال انك تدير  كوبلي اولد سكول تغني فوق البومباب بلطوتين بدرجة عالية لطوتين باه يجرح فالوذن .. او حرام فالراب حراام وعيب ..ممكن تتمرد وتستخدموا في روفران لبأس .. 

 لكن للأسف بصحتكم الجمهور تعنا جاهل لهذه الأمور وجاهل لثقافة الهيب هوب وجاهل لأصول هذا الفن و La revolution  تع الراب منين خرج وكيفاه ووش لازم ... ووعلاه هكة ؟

مكانش مشكل انك تغني بلوطوتين لكن المشكل في كيفية أستعمالو يعني ماتخدمش بلوطوتين حتى يفاصيلك النبرة الطبيعية تع صوتك خليه يكون ثانوي مش رئيسي  .. هو أصلا فالريڨلاج فالبرنامج في لوطوتين عندك قوة تأثير تقدر تطلع وتهبط وتتحكم فيها كيما تحب ..

  لاحظت بزاف رابورات يغني بلوطوتين وهو طايح Fausse note مع مقام الالحان في جهة وهو يغني في جيهة .. وهذا خطأ شائع والضربة لكبيرة فالـingénieur de sons لي انتجلوا الغنية يعني ما يلاحظش انو Hors gamme  .. وكاين فئة تع منتيجين هنا في دزبرك يحبو يليكيدو الخدمة للناس برك ..دز برك .. هاذو منتجين غيارين وماتخدموش عندهم  .. 

 نصيحة لجميع الرابورات تقدر تروح تتعلم وتقرأ عالمقامات الموسيقية مش عيب كي تعرف ولا تسقسي كاين يوتوب وانا واحد مالناس فالخدمة لأي واحد  ..العيب كي تبقى هكاك ومضروب بالبارانويا ..  اتعلم سقسي مكانش لي خلق يعرف فالدنيا .. راهو كلش تبحث عليه .. ولي عطاك حاجة ومباعد عايبك بيها راهو ضعيف شخصية وماهوش فنان هذا ... هذا حاب شيعة بلا شبعة .. كاين يوتوب ..

وبالنسبة للمدرسة الجديدة  روادها يخدموا بلوطوتين عادي ولي قالك ماتغنيش بلوطوتين راهو جاهل لثقافة الراب عن إخر لأنو احنا مانعرفوش كيما lil wayne وt pain و kanye west.. والمنتجين بأمريكا وأصحاب الأختصاص .. 

  يعني فالنيو سكووول يجوز انك تخدم بلوطوتين لأنو داخل في مميزات هذا الطابع وتعرف كيفاه تخدم بيه وتحسن إستخدامو فقط ... chris brown  و usher و pitbull هاذو جماعة electro وRnb و pop هاذو يستعملوه ملي بداو لاكاريار تعهم صح ..لأنو لوطوتين دخل لميدان الانتاج في اوخر التسعينات وهم بداو في تلك الحقبة يبانو  ..وكان قبلو مؤثر يسموه  Talkboxو هذا المؤثر لي خدم بيه توباك كالفورنيا love .. اسمع الغنية تعرف مؤثر talkbox  .. وكانو مؤثرات شوي قبل لوطوتين .. 

والروبوتيك يا خاوتي ليس هو الاطوتين ..الروبوتيك Robotic هو مؤثر آخر كيما لي يستخدموه الفرقة القديمة لي نحبها هي فرقة Bomfunk mc's في أغنية Super electric  هاذ الفرقة مكانش لي ماشطحش عليها break dance فالصغر ..هاذو يستعملوا مؤثر الـRobotic في بعض المقاطع .. وكاين هذا المؤثر في لوجيسيال FL STUDIO ويسموه Vocoder ....

إن شاء الله تكونوا إستفدتم ولو القليل ولي عندو أي إشكال يتفضل يطرح تساءل ..🎩